Dr Aafang vom Novämber het s in däm Johr bsunders gmacht,
an Stell vo Chelty, Näbel, Froscht het meischtens d Sunne glacht.
Y ha das gnosse, Liecht und Hälli hämmer richtig gnützt
und mii bim Umgang mit däm struube Wältgscheh unterstützt.

Doch denn het sich dr Spootherbst wiider an sy Regle ghalte,
het Näbel, Rääge, Schnee und Bise zytgerächt lo walte.
Jetz chan y numme hoffe, dass au d Menschheit do drus lehrt
und ihre Umgang mitenand e Bitz ins Bessere chehrt.

Das fählend Liecht, die menschlig Wermy miemer sälber bringe
mit Näggschteliebi, Fründligkeit, mit Fyre und mit Singe.
D Adväntszyt söll nit nur e Gschäft und lute Rummel sy!
Wenn mir das friidlig aanegriege, bin y au derby.

Euch allne, wo das läse, wünsch y, s gieng euch au eso.
Denn dörf die Zyt mit Wiehnachtsmärt, mit Liechter, Stärne cho.
Ihr wirgget sicher au in däm Sinn, s wird euch glinge, dängg y!
Mit liebe Wünsch für d Wiehnachtszyt griesst euch
dr Hansjörg Hänggi

Hansjörg Hänggi, freischaffender Autor in Therwil, bekannt durch seine Lieder- und Geschichten-Abende.